Будалаал
Буда́лаал ин абула малаиктайпаял авар мифологиялда ругел рижабазда. ГIемерисел мугӀрузда, парсазда, цогидал борхалъабазда, цинги нахъабазда бетӀербахъи гьарулел рукӀуниланги абула.
Сипат-сурат
[хисизабизе | код хисизабизе]Гьезие кьураб сурат-сипаталда рекъон, гьел ккола рорхатал, бахьинаб тӀомол, жидехъ кӀудияб кӀвар бугел жал. Цо-цо росабалӀ гьел халаталгун хӀалакъал жал ругин абула, цӀохъахӀаб тӀомолӀан гьезул рукьби къватӀикӀанцӀун рукӀун рихьулила. Гьенисан бачӀун батизе ккола фразеологизм «буда́лаъ гӀади́н лӀу́гьун ву́го» («лъикӀ хӀалакълъун вуго» ян абулеб жо). Малаикзабаздаги гьаздаги гьоркьоб цо параллел букӀине ккола, щай гурони малаикзабиги авараз рикӀкӀуна «рокьотӀа ракъварал жал» ругин. Гьелда хурхунги рукӀине ккола хадусел хӀалакълъуда жалго хурхарал фразеологизмал: «рукьбу́зул мала́ик гIади́н лӀу́гьун ву́го», «мала́икги мун гу́рев ме́халъ, щай кванала́рев?».
Къелдерица бицанихъе, Будалаал рихьизе гӀадамаздаса батӀиял гьечӀо, гьабулеб-толебги чиясул, хӀо ретӀа-къай букӀуна кидаго хъахӀаб. Гьадингоясел гӀадамазда гьел рихьуларо, валиязда гурони. МагӀарда-гӀалхуда рукӀаго, лъикӀ гӀенеккани, рикӀкӀалъуда кин Будалааз зикр бачунеб куц рагӀизе рес буго.
Сомодисел божула Будалаал гьазул росдаса цочанго километралъ гӀодогӀан бугеб ХахӀаб раса (лит. «ХъахӀаб раса») абураб расалъуда, гьадалаб хӀорида гӀагарда бугеб Лъамир абураб магӀарда ругин. Гьаз гьадалабин рикӀкӀунеб хӀорилӀ НухӀил росол хутӀалабиги ругин божула гьал («НухӀ аварагасул гамил хутӀел»). Гьал бакӀаздаса гӀебеде, хириял рукӀиндал, сомодисез боцӀи гъоларо. Ракьуда тӀадго цохӀо гьаниб гурони бижуларила кваналеб ва цӀакъго даруяб хер, Аварагасул-ПатӀиматица-Квер-ЧӀвараб-хер ин жинда цӀарги бугеб. Гьелъул тӀанхал рукӀунила чиясул кверзул сипаталда (килщалкинаб).
Мифологиялда
[хисизабизе | код хисизабизе]Щибаб Аварлъул росдал чагIаз бицуна, гьезул бищун борхатаб мегIер яги кьуру бугони, Будалаал гьенир рукIунин бетIербахъи гьабулелан абун.
Гендерица абула гьел Щугъи-магIарда рукIунин. Гьезие чидакъаб, гIалхулаб, чилъудаса бацIадаб, би тӀечӀеб бакӀ бокьулила, тIабигIатгун цолъизе рес жидее бугеб. Гьезго бицанихъе, гьел Аллагьасукь хIинкъарал рижаби ккола, хӀо исламалда рекъон гьезул иш-пиша бичасда хурхарал гьечIо: къинай чIужугIаданалъул ургьиса, гьарурал къо арал, кинидухъ лъун тарал цинги батIиял гIисинал лъимал рикъулила гьез. Божулезе бокьуларо «рикъулин» абизе, гьез абула «рачун уна», щай гурони Будалаал гьадалал ккола. Гьедин рикъун арал лъимал гIалхуда, гьезда аскIор ругелгIанасеб мехалда, будалаълъулила (Будалаал лIугьунила).
Гьезул церетелазул рол жидедаго босула ХудучӀаз: Будалаазе бокьани, тӀоцебесел, мугӀруздаса гӀодореги рештӀун, гьезие жеги ургьиса къватӀибе бачӀинчӀеб лъимер бикъизе уна. ХудучӀаз рикъун, Будалаазухъе магӀарде щвезарулила лъимал.
Щулани божула, ГудучӀица бикъараб лъимер будалаълъулин ва гьел бетӀербахъи гьарун Кьили-магӀарда рукӀунин. Нух къосарал чанахъабазда гьез нух бихьизабулила.
Этимология
[хисизабизе | код хисизабизе]Буда́лаъ (budálaʔ), яги будала́ъ (budaláʔ) абураб рагӀи бачӀана гӀараб. بُدَلَاء (budalāʔ) абураб формалдасан. Жибгоги ккола بَدَل «субститут; лъикӀав, вацӀадав, динияв чи; гьадал» рагӀул гӀемерлъул форма. Гьаб рагӀи гӀарабалдасан гӀемерал мацӀазде бачӀана (аслиго османалӀан): рум. budala «гӀабдал», сербо-хорв. budala, словен. budàla, турк. budala (aptal, abdal формаби рукӀаго) «гӀабдал; идиот; гьадингоясев чи».
Диалектазда
[хисизабизе | код хисизабизе]Авар диалектазда чанго батӀияб хъвалебги абулебги куц буго – метатезагунцинги – баду́лаъ/баду́лаал. ГIандалацаги буда́лаал абула (СугъралӀ, Ругъжаб), БацIада буда́лагIзаби абула гI.ф.-да, буда́лагI – ц.ф.-да. Къелеб муда́лаъ/муда́лаал. ГIанди мацIазда дандчIвала гьадинал формаби: жибго гIанди мацIалда будалол/будагIол «магIарул малаикзаби», гъодобери – будалиял, гӀахьвал. будалагIал, кӀкӀаратӀ. будали, будалди, цинги цезазул будалаби, гьунз. будалалио раженли, хварш. будалла ба цинги гь.ц.