Перейти к содержанию

АхӀмос I

Википедия — эркенаб энциклопедия сайталдасан материал

Халип:ПиргӀавн

АхӀмос I (егип. jꜥḥ ms(j.w), абул куцалъул реконструкция /ʔaʀaħ'ma:sjə/ (ГьЕ), Египтологиялда цӀалулеб куц АхӀмос, цо-цо хъвала Амосис I, "Аменес" ва "АахӀмес" абунги, цӀаралъул магӀна «АхӀ (моцӀ) бижана»[1][2]) вукӀана НекӀсияб Египталъул пиргӀан ва XVIII династиялъе кьучӀ лъурав чи. Васеталъул къиралзабазул династиялъул чи, эв вукӀана II СекъененрагӀ ТагӀал вас, XVII династиялъул тӀарамагъадисев пиргӀан Камосил вац. АхӀмосил кӀудияв инсул ва инсул бетӀерлъул мехалда, Васет данде бахъана Гъоркьияб Египталда кверщел гьабун рукӀарал гьиксосазде данде. Эсие анкьго сон бугеб мехалда чӀвана юсул эмен,[3] гьелдаса лъабго сон индал, лъалареб гӀиллаялдалъун хвана эсул вац Камос, жиндица пиргӀанлъи лъабго соналъ гурони гьабичӀев. АхӀмос I бетӀерлъуде вачӀана вац хун хаду,[4] 10 сон бугеб мехалъ, ва коронациялдаса хаду эсие кьуна цӀар nb-pḥtj-rꜥ «Рал къуваталъул бетӀер» абураб магӀна бугеб.

Жиндир пиргӀанлъуда жаниб, АхӀмосица рагӀалде бахъинабуна гьиксосазде данде гьабулеб букӀараб рагъ, элги щущахъ риххизарун, кьуд гьабуна Гъоркьияб Египет, Васеталъул нухмалъиялъукье бачана тӀолабго Египет, гьединго элъул кверщаликье нахъруссинаруна жиндирго рукӀарал Нубияги КанагӀанги.[4] Хаду АхӀмосица гьабуна пачалихъияб администрациялъул реорганизация, рагьана магӀданал рахъулеб цӀиял бакӀал, даран-базаралъе нухал ва байбихьана Гьоркьохъеб къираллъул мехалдасаго гьарурел рукӀинчӀел архитектуриял проектал рай. Гьеб хӀаракаталъул заваллъун ккана египтияз тӀарамагъадисеб пирамида бай. АхӀмосица бетӀерлъи гьабулеб мехалда кьучӀ тӀамуна Египталъул кӀвейигун цебетӀей тӀогьибе бахараб империялъе.

Къо-моцӀ ва бетӀерлъул мех

[хисизабизе | код хисизабизе]

I АхӀмосил пиргӀанлъуе чӀезабизе бегьула гӀезегӀан мухӀканаб къо-моцӀ, эсул ирсиласул мехалда букӀараб Сириусалъул гелиактикияб баккиги гӀадахъ босун, амма гьелда хаду хал кквей букӀараб бакӀалда хурхун бахӀсал рукӀиналъ, I АхӀмосил бетӀерлъул мехалъе, батӀи-батӀиял иццазда рекъон, рихьизарулел сонал руго 1570–1546, 1560–1537, 1551–1527 ва 1539–1514 нилӀеде щвелалде.[5][6][7] Манефоница АхӀмосил къираллъиялъе кьола 25 сонги 4 моцӀги[5] (амма Манефоница наслуялъул тӀоцевесев пиргӀан "Тетмосис" абураб цӀаралда рехсон вукӀиналъ, батизе бегьулеб жо буго, эс батӀияв рехсолев вукӀин). Гьеб тарих ритуІхъ гьабула Тураялъул гамачӀ бахъулел бакӀазда батараб хъвай-хъвагӀуца, жинда АхӀмосил пиргӀанлъул "22 сон" рехсон бугеб.[8] АхӀмосил мумиялъул гьабураб медикияб хал-шалалъ чӀезабуна эв гІ. 35 сонил гӀужда хвей, элъ ритӀухъ гьабула гьес 25 соналъ бетӀерлъм гьаби (гьев 10 сонил ригьда тахиде вачӀинги гӀадахъ босун).[5] Эсул пиргӀанлъи байбихьиялъе радиокарбониял къо-моцӀазул диапазон чӀезабуна 1570–1544 НЩ, эзул гьоркьохъеб ккола 1557 НЩ.[9] Артур Вейгаллида рекъон, I АхӀмосил къираллъул мех ккола гьединго 25 сон (1576–1551 сс НЩ).[10]

АхӀмосил къираллъуе батӀияб мехалъул къотӀел (1194–1170 НЩ) бихьизабуна Давид Ролица,[11] амма гьеб нахъчӀвана гӀемерисел египтологистаз 2010 соналъ радиокарбонияб анализалъул хӀасилалъул публикация гьабилалдего.

Рагъул кампанияби

[хисизабизе | код хисизабизе]
I АхӀмосил цӀар жинда бугеб ханжар. Онтариоялъул Роял Музей. Торонто.
Ханжаралъул тӀагъиялда бугеб АхӀмосил картуш.

Васеталда ругел пиргӀаназдаги ва гьиксосазул къирал Апепида гьоркьоб рагъ байбихьана I АхӀмесил эмен СекъененрагӀ ТагӀал заманалда ва лъебергогӀан соналъ халатбахъана, гьеб рагъ, гьиксосалги щущахъ риххизарун, лӀугӀизабуна I АхӀмосица. РикӀкӀуна СекъененрагӀ ТагӀа гьиксосазулгун рагъулӀ чӀванин абун, гьелъие хӀужжалъун буго гьесул мумялда ругел гӀемерал къотӀарал ругънал. СекъенерагӀ ТагӀал ирсилав, Камос (АхӀмосил кӀудияв вацлъун ватизе бегьула), лъалеб жо, чанго нухалъу тӀаде кӀанцӀана гьиксосазул тахшагьар Аварисалда сверун ругел ракьазде[3]. Камосил къираллъи къокъаб букӀун батизе буго, щай гурого гьесул бетӀерлъиялъул жиндие хӀужжаби ругеб сонлъун кколеб буго 3-абилеб сон. Гьев хисун вачӀана I АхӀмос. Гьебго заманалда хун ватизе вуго Апепиги. КӀиго канагӀаниязул цӀар — Аусерра ва Акъениенра — жал тарихиял иццазда Апепие рехсон ругел, ккола цого къираласул цӀараллъун, гьел хӀалтӀизарулаан АхӀмосил тушбабаз батӀи-батӀияб заманалда жаниб.

I АхӀмос бетӀерлъуде вачӀана жеги лъимерлъуда вукӀаго, ва гьев балугълъиялде вахинегӀан, регентлъун йикӀана гьесул эбел АхӀхӀотеп. Египеталъе нухмалъи гьабулеб букӀараб заманалъ гьелъул рукӀарал ролазул (гьенибго хӀурматияб титул "Египеталъе нухмалъи гьабуей") сипатазда рекъон, АхӀмос балугълъиялде вахиналде, гьелъ Васеталъул аристократия консолидатинабула. ХӀакъикъаталда, Апепи II вукӀун ватани I Апепил ирсилавлъун, гьев АхӀхӀотепица регентлъиялъул заманалда Дльтаялде нахъе къазавула, гьелъи хӀужжалъунги буго Бубастис шагьаралдаса жанубияб рахъалдехун цониги монументазда гьесул цӀар тӀокӀалъ гьечӀолъи[12]

Гиксосазда тӀад бергьенлъи боси

[хисизабизе | код хисизабизе]

КъватӀисел улкабазде рагъул сапарал

[хисизабизе | код хисизабизе]

Гьиксосазда тӀад бергьенлъи босун хадуб, АхӀмосица байбихьана Шамалда ва Нубиялда рагъул кампаниял. Гьесул 22-абилеб соналъул кампания щола Шамалда бугеб Джахи абулел ракьалде ва, батизе бегьулеб жо, Фурат гӀоралде щвезегӀанги, амма гӀемерисеб Фурат гӀоралде щвезегӀан рагъул сапарал гьарурав пиргӀанлъун рикӀкӀуна Тутмос I. БукӀаниги, АхӀмосица кверщаликье рачуна Къедем абулеб бакӀги (рикӀкӀуна Библосалда аскӀоб букӀанин абун) ва гьелде щвезегӀан ругел ракьалги, гьелъие нугӀлъи гьабула гьесул хъизан АхӀмос-Нефертарил хоб-рокъоб батараб остраконалъ.[13] Гьеб кампаниялъул киналниги лӀугьа-бахъинал мухӀканго лъалел гьечӀо, щай абуни информациялъул аслияб иццлъун вукӀараб Ибанал вас АхӀмосица, жив рагъулаб флоталда хъулухъалда вукӀарав, гьеб ракъдада гьабураб рагъул сапаралда гӀахьаллъи гьабичӀолъиялъ. Амма Шималияб КанагӀаналда гьарурал археологиял рухъа-хъваязда рекъон абизе бегьула н. щ. XVI гӀасруялда АхӀмосида ва гьесде гӀагарал ирсилазда ракӀалда букӀанин КанагӀан бахъизе гуреб, амма гьиксосазул хӀакимлъи тӀубан тӀагӀинабизе. Гьенир гӀемерисел бакӀал гьеб заманалда чӀунтизаруна ва чӀорого гьарун руго ва хадур цӀи гьарун гьечӀо — гьеб хӀалтӀи ракьал рахъизе ва мукӀур гьаруразда тӀад магъало лъезе ракӀалда бугел пиргӀавназ гьабулароан.[14]

I АхӀмосица Нубиялда гьарурал кампаниязул документация гьабун буго дагьабги лъикӀ. ТӀоцебесеб Нубиялъул кампания лӀугӀун гӀемерго заман иналде, Аата абун жинда цӀар бугев нубиясул бетӀерлъуда гъоркь байбихьула нубиял АхӀмосиде данде рахъин, амма гьел гъурула. Гьелдаса хадуб Уасеталде данде чӀарав египтянас, Течен абун жинда цӀар букӀав, Нубиялда ракӀарула пиргӀавнасде данде гӀемерал чагӀи, амма гьелги гъурула. АхӀмосица Египеталъул Нубиялда тӀад букӀараб кверщел букӀадахъин гьабула, гьеб цӀуни ва гьелда хадуб хал кквей тӀалъула Бухеналда гьабураб цӀияб административияб марказалда.[15] Батизе буго, Египеталъул Нубиялда тӀад миллияб хӀакимлъи гьабун хадуб, АхӀмосица жиндие ва жиндаса цере рукӀарал пиргӀавназе кумек ва квербакъи гьарурал амирзабазе ва гьезул тухумазе шапакъатал гьари.[16]

Гьунарлъи ва момнументал рай

[хисизабизе | код хисизабизе]
I АхӀмосил курхьеназул бутӀа, Лувралъул музей

АхӀмосил заманалда, ТӀасияб ва Гъоркьияб Египет цӀидасан цолъидал, байбихьана монтументал разе ва гьунарлъиялъе квер бакъи гьаби. Документазда рекъон, АхӀмосица кинабниги пачалихъалъе тӀаде бачӀунеб бечелъиялъул 10 бутӀа гьабун цо бутӀа буссинабуна магӀбадазде ва илагьазе лъаглъи гьабиялъе,[17] монументал рай цӀи гьабиялъе ва искусство цебетӀеялъе. Гьиксосазда тӀад бергьенлъи боси АхӀмосил къираллъиялъул ахиралда гӀадин букӀиндал, гьесул монументал ралел проектазул халалъи букӀана 7 соналдаса цӀикӀкӀинчӀеб,[18] ва гӀемерисел гьес разе байбихьарал монументал рагӀалде рахъинарун ратизе бегьула гьесул вас ва ирсилав I АменхӀотепица.[19]

Гьесул къираллъиялъул заманалда устарзабаз гьарурал хӀалтӀаби руко цебе букӀараб кӀиабилеб хиси ккараб заманалъул хӀалтӀабаздаса дагьалги мухӀканал, амма цо-цо Басрияб ва Гьоркьохъеб ханлъиялда гьарурал махщалилал хӀалтӀабаздаса къурал[20]. Египетги цолъизабун, Нубиялда тӀад кверщелги гьабун хадуб, египтянязе щола ТӀасияб Египеталдаса щоларел рукӀарал сурсатал. Нубиялдаса бачӀине байбихьула месед ва гӀарац, лазурит гьоркьохъеб Азиялъул батӀи-батӀиял бакӀаздаса, кедралъул цӀул Джубайлалдаса[21]. Синаялда рагьула СарабитӀ ал-Хадималда пируз бахъулел бакӀал[22]. Криталда ва Египеталда гьоркьор рукӀарал хурхеназул хӀакъалъулӀ мухӀканго лъалеб гьечӀо, амма цо-цо Криталда хурхарал суратал ратана гьеб заманалъул монументазда, ва Египеталъ рикӀкӀунаан Эгей рагъдал регион жиндирго империялъул бутӀалъун[21]. АхӀмосица цӀидасан рагьула Тураялда монументал разе хӀалтӀизабулеб гачилгамачӀ бахъулеб бакӀ; гьениб батараб хъвай-хъвагӀиялда рекъон, гьениса гамачӀ баччизе хӀалтӀизарулаан Финикиялдаса оцал.[23]

Pharaoh Ahmose I slaying a probable Hyksos. Detail of a ceremonial axe in the name of Ahmose I, treasure of Queen Ahhotep II. Luxor Museum[24][25][26]

АхӀмосил ханлъиялъул заманалъул искусствоялъ такрар гьабула Гьоркьохъеб ханлъиялъул заманалъул ханзабазулаб Уасеталъул стиль[27], гьеб заманалъул стеллабазул руго цого сипатал[22]. Гьелъ бихьизабиулеб батизе буго консервативияб тенденция гьиксосазда цебесеб периодалъул модаялде бугеб. БукӀаниги, живго I АхӀмосил абун идентификация гьабураб статуя буго лъабго: цояб — шабти, цӀунун буго жакъа къоялъ Британиялъул музеялда, гьеб статуя рикӀкӀуна АхӀмосил хоб-рукъалъуса бугин абун, амма хоб-рукъалде тӀаде археологал жеги ккечӀо; ва кӀиго статуя гӀадамасул борхалъиялда гьабураб, гтезкл цояб буго Нью-Йоркалъул Метрополитен музеялда, цогидаб — Хартумалъул музеялда[27]. Шотландиялъул миллияб музеялда бугеб гачилганчӀил гьабураб сфинксалъул статуя, стилалде балагьун, гьединго рикӀкӀуна I АхӀмосил бугин абун[28]

РикӀкӀуна I АхӀмосил заманалда Египеталда байбихьанин цӀвер гьаби цебе тӀезе абун. ЦӀвералъул бищун басриял мисалал ратизе руго фаянс гьабулаго дефект лӀугьарал жаллъун, жибго цӀвер гьаби букӀичӀо XVIII наслуялде щвезегӀан. Гьеб заманалъул бищун басриял цӀвералъул маххазда руго АхӀмосил ва АменхӀотепил цӀарал, ва хъвай-хъвагӀиялъул къагӀида буго гьезул ханлъиялъул заманаялъ букӀараб къагӀидаялда релъараб[29]. ЦӀвер гьаби I АхӀмосиде щвелалде букӀунги батичӀони, тӀоцересел цӀорол тӀагӀалабазе датировка I АменхӀотепил заманалдаса кватӀунги гьабичӀони, цӀвер гьаби ургъун батизе буго цо чияс[29].

АхӀмосица байбихьула кӀиабилеб хиси ккараб заманалде щвелалде гьарулел рукӀарал архитектуриял проектал гьари цӀи гьабизе. Улкаялъул жанубияб рахъалда байбихьула магӀбадал гьаризе, аслияб къагӀидаялъ кирпичазул, гьединеб цо магӀбад бан буго Нубиялъул Бухен шагьаралда. ТӀасияб Египеталда Карнакалда бугеб Амунил ва Арманталда бугеб Монтул магӀбадал тӀадего рана[22]. Тураялда бугеб хъвай-хъвагӀиялда рекъон[23], АхӀмесица хӀалтӀизабулаан хъахӀаб гачигамачӀ ПтахӀие магӀбад базеги ва Амуние жанубиял "хӀарем" базеги, амма гьеб кӀиябго проект лӀугӀизабичӀо[22]. Абидусалда жиндирго кӀодоэбел Тетишерие бана кенотаф.

Аварис шагьар букӀараб бакӀалда Манфред Битакица гьарурал археологиял рухъа-хъваяз бихьизабуна I АхӀмосил гьиксосазул шагьаралъу бакӀалда бараб кӀалгӀа букӀин. Битакида батана Миноялъул фрескабазул бутӀаби, жал кӀалгӀаялъул къадазда ккун рукӀарал; рукӀана гӀемерал батӀи-батӀиял пикраби Эгейялъул цивилизациялъул даран-базаралдаги искусствоялдаги букӀараб ролалда хурхун[30].

Хиралъаби ва церемониалияб ярагъ АхӀхӀотепил хоб-рокъоб ратарал, гьездаго гьоркьоб гӀащтӀиги, жиндир балалда гьиксосазул рагъухъанасда кьаби щвезабулев I ахӀмосил сурат бугеб,, ва меседил тӀутӀал абулел шапакъатал, жал АхӀхӀотепие гьелъ гиксосазде данде рагъулӀ гьабураб хӀалтӀиялъухъ кьун рукӀарал.

АхӀмоосил ханлъиялда, Уасет шагьар, Гьоркьохъеб ханлъиялъул байбихьуда гӀадин, цӀидасан лӀугьуна тӀолго Египеталъул тахшагьарлъун. Гьедин гьеб шагьар лӀугьуна цӀигьабураб ватӀанчилъияб хъулухъалъул центрлъун, хӀажаталлъун лӀугьана къаламчагӀи ва лъай бугел, ханхабазул архивал цӀезе байбихьана такърираздалъун ва хӀисабаздалъун[31]. Уасет тахшагьарлъун бищиялъе гӀиллалъун букӀун батизе ккола гьелъу бугеб бакӀ стратегиялъул рахъалъ лъикӀаб букӀин: гьеб букӀана пачалихъалъул бакьулӀ, гьенисан гьаруна АхӀмосица рагъал шималияб рахъалда гьиксосазде, жанубияб рахъалда хӀабашиязде данде, ва хадубги, гьеб кӀиябго рахъалде рагъул сапар гьаризе санагӀалъи букӀин[17].

Бищун кӀвар бугеб хиса-баси ккала динияб рахъалдаги: Уасет шагьар байбихьана лӀугьине пачалихъалъул сиясатияб гуребги динияб центрлъунги, бакӀалъул илагьлъун вукӀарав Амун, жинда АхӀмосица гьиксосазда тӀад ккурал бергьенлъаби хурхинарурав, байбихьана лӀугьине тӀолго египеталъул илагьлъун. Карнакалъул магӀбадалъул комплексалъул (жиб Уасеталъу шималияб рахъалда Нилалъул бакъбаккудехун бугеб рагӀалда букӀараб) кӀвар цӀикӀкӀине байбихьула, цебе букӀараб Ра илагьасул культ, жиндир аслияб бакӀ Гелиополалда букӀараб, загӀиплъула[32].

Карнакалда чанго стела, жидеда тӀад АхӀмосица гьарурал хӀалтӀабазул хӀакъалъун хъвай-хъвагӀиял ругел, гьезул кӀигоялъ АхӀмос вихьизавун вуго магӀбадалъул вакиллъун. Цояб стелаялда, жиб "бураналъул стела" абун машгьураб, рехсон буго АхӀмосица жинда цере рукӀаразул кӀудияб бураналъ риххизарурал пирамидаби цӀи гьари[33]. Цо-цо гӀалимзабаз рикӀкӀуна "Бураналъул стелаялда" рехсон бугеб кӀудияб бураналъ пирамидаби риххизари рикӀкӀуна Миноялъул вулкан кӀанцӀиялда хурхараб бугин абун.

Пирамида

[хисизабизе | код хисизабизе]
АхӀмосил пирамидаялъул хутӀелал.


Хъизан

[хисизабизе | код хисизабизе]

АхӀмос вукӀана Уасеталъулаб XVII наслуялъул чилъун. Гьесул кӀудияв эмен Сенахтенра АхӀмосиил ва кӀудияй эбел Тетишерил рукӀана анцӀила кӀиде гӀунтӀун гӀемерал, гьезул Секъененра ТагӀал ва I АхӀхӀотепил васлъун ккола Камос ва АхӀмос I, гьезул йикӀана цо чанго яцги[34]. ГӀадаталда рекъон, АхӀмосица ячуна жиндирго яц АхӀмос-Нефертари ва гьаюла гьей кӀудияй чӀужулъун[35]. Гьезул лъималлъун ккола ясал Меритамун B, Ситамун A ва васал Сиамун А, АхӀмос-гӀанх[36], АменхӀотеп I ва Рамос А[37] (цӀаразда цадахъ ругел "А" ва "B" ккола шартӀиял гӀаламаталъун, жал египтологаз цого цӀар бугел пиргӀавнасул лъимал ва лъудби ратӀа гьаризе хӀалтӀизарулел). АхӀмосил яслъун йикӀун ятизе бегьуле Мутнофретги, жий I Тутмосил лъадилъун яхъарай. I АхӀмосил тӀоцевесев ирсилавлъун вукӀана АхӀмос-гӀанх, амма гьев хола инсудаса цеве, гьесул ханлъиялъул 17-б ва 22-б саназда гьоркьоб заманалд[38]. АхӀмосидаса хадув ханлъуде вачӀуна гьесул вас АменхӀотеп I, жица инсуда цадахъ къокъаб заманалъ ханлъи гьабун батизе бегьулев.

XVII ва XVIII наслабазда гьоркьоб цоцадаса тӀей букӀинчӀо. Жив Птолемеязул заманалда вукӀарав тарихчи Манефоница рикӀкӀунаан гьиксосаздаса Египет эркен гьаби, гьел Египеталде рачӀун хадуб нусго сон индал, ва тӀолго Египеталда египтяназул миллияб хӀакимлъи букӀадахъин гьаби цӀакъ кӀвар бугеб лӀугьа бахъинлъун, жиндалъун цӀияб наслу байбихьизе[39].

Тухум-кьибил

[хисизабизе | код хисизабизе]

Мумия

[хисизабизе | код хисизабизе]

Ирс

[хисизабизе | код хисизабизе]

Балагье гьединго

[хисизабизе | код хисизабизе]

МугъчӀваял

[хисизабизе | код хисизабизе]
  1. ↑ Ranke, Hermann (1935) Die ägyptischen Personennamen, Glückstadt: Verlag von J. J. Augustin, volume 1, page 12.19
  2. ↑ Leprohon, Ronald (2013), Denise Doxey, editor, The Great Name: Ancient Egyptian Royal Titulary, Atlanta: Society of Biblical Literature, page 96
  3. 1 2 Shaw. (2000) p. 199.
  4. 1 2 Grimal. (1988) p. 192.
  5. 1 2 3 Grimal. (1988) p. 193.
  6. ↑ Helk, Wolfgang. Schwachstellen der Chronologie-Diskussion pp. 47–9. Göttinger Miszellen, Göttingen, 1983.
  7. ↑ Encyclopaedia Britannica Ahmose I | Accomplishments & Facts | Britannica.com
  8. ↑ Breasted, James Henry. Ancient Records of Egypt, Vol. II p. 12. University of Chicago Press, Chicago, 1906.
  9. ↑ Christopher Bronk Ramsey et al., Radiocarbon-Based Chronology for Dynastic Egypt, Science 18 June 2010: Vol. 328. no. 5985, pp. 1554–1557.
  10. ↑ Артур Вейгал. ПиргӀаназул тарих.
  11. ↑ David Rohl, Pharaohs and Kings (1995), ISBN 0-609-80130-9
  12. ↑ Цитация мекъи: Мекъаб тег <ref>; мурад баян гьабун хъвалеб Grimal 1942 -лъе текст бихьизабун гьечІо
  13. ↑ Weinstein, James M. The Egyptian Empire in Palestine, A Reassessment, p. 6. Bulletin of the American Schools of Oriental Research, n° 241. Winter 1981.)
  14. ↑ Weinstein, James M. The Egyptian Empire in Palestine, A Reassessment, p. 7. Bulletin of the American Schools of Oriental Research, n° 241. Winter 1981.
  15. ↑ Цитация мекъи: Мекъаб тег <ref>; мурад баян гьабун хъвалеб Grimal 1902 -лъе текст бихьизабун гьечІо
  16. ↑ Shaw and Nicholson. (1995)
  17. 1 2 Maspero, Gaston. History Of Egypt, Chaldaea, Syria, Babylonia, and Assyria, Volume 4 (of 12), Project Gutenberg EBook, Release Date: December 16, 2005. EBook #17324.
  18. ↑ Shaw. (2000) p. 209.
  19. ↑ Shaw. (2000) p. 213.
  20. ↑ Rice. (2001) p. 3.
  21. 1 2 Catalogue Général 34001, Egyptian Museum, Cairo.
  22. 1 2 3 4 Grimal. (1988) p. 200
  23. 1 2 Quarry Inauguration Архивация 2010-06-05 Wayback Machine, accessed July 28, 2006.
  24. ↑ Daressy, George (1906). Annales du Service des antiquités de l'Egypte. Le Caire : Impr. de l'Institut français d'archéologie orientale. гь. 117.
  25. ↑ "Others were later added to them, things which came from the pharaoh Ahmose, like the axe decorated with a griffin and a likeness of the king slaying a Hyksos, with other axes and daggers." in Montet, Pierre (1968). Lives of the pharaohs (мацӀ: английский). Weidenfeld and Nicolson. гь. 80.
  26. ↑ Morgan, Lyvia (2010). "AN AEGEAN GRIFFIN IN EGYPT: THE HUNT FRIEZE AT TELL EL-DABcA". Ägypten und Levante / Egypt and the Levant. 20: 308. ISSN 1015-5104.
  27. 1 2 Edna R. Russman et al. Eternal Egypt: Masterworks of Ancient Art from the British Museum, pp. 210–211.
  28. ↑ Russman, Edna A. "Art in Transition: The Rise of the Eighteenth Dynasty and the Emergence of the Thutmoside Style in Sculpture and Relief", Hatshepsut: From Queen to Pharaoh. p.24–25. The Metropolitan Museum of Art. 2005. ISBN 1-58839-173-6
  29. 1 2 Gordon, Andrew H. A Glass Bead of Ahmose and Amenhotep I. p. 296. Journal of Near Eastern Studies, vol. 41, no. 4, October 1982.
  30. ↑ Shaw. (2000) p. 208.
  31. ↑ Tyldesley, Joyce. Egypt's Golden Empire: The Age of the New Kingdom, pp. 18–19. Headline Book Publishing Ltd., 2001.
  32. ↑ Tyldesley, Joyce. The Private Lives of the Pharaohs, p. 100. Channel 4 Books, 2004.
  33. ↑ Shaw. (2000) p. 210.
  34. ↑ Grimal. (1988) p. 194.
  35. ↑ Grimal. (1988) p. 190.
  36. ↑ Dodson. (1990) p. 91.
  37. ↑ Dodson, Aidan; Hilton, Dyan. The Complete Royal Families of Ancient Egypt, p. 126. Thames & Hudson, 2004.
  38. ↑ Wente (1975) p. 271.
  39. ↑ Redford. (1965) p. 28.

Библиография

[хисизабизе | код хисизабизе]

РегӀелал

[хисизабизе | код хисизабизе]
  • Breasted, James Henry. Ancient Records of Egypt, Vol. II University of Chicago Press, Chicago, 1906. ISBN 90-04-12989-8.
  • Catalogue Gènèral 34001, Egyptian Museum, Cairo.
  • Clayton, Peter. Chronicle of the Pharaohs, Thames and Hudson Ltd, paperback 2006.
  • Cooney, J. D. Glass Sculpture in Ancient Egypt. Journal of Glass Studies 2 vol. 11, 1960.
  • Dodson, Aidan. Crown Prince Djhutmose and the Royal Sons of the Eighteenth Dynasty The Journal of Egyptian Archaeology, vol. 76, 1990.
  • Dodson, Aidan. Dyan, Hilton. The Complete Royal Families of Ancient Egypt Thames & Hudson, 2004. ISBN 0-500-05128-3.
  • Edna R. Russman, et al. Eternal Egypt: Masterworks of Ancient Art from the British Museum. 2001. ISBN 0-520-23086-8.
  • Gardiner, Alan (Sir). Egypt of the Pharaohs, Oxford University Press, 1964. ISBN 0-19-500267-9
  • Gordon, Andrew H. A Glass Bead of Ahmose and Amenhotep I. Journal of Near Eastern Studies, vol. 41, no. 4, October 1982.
  • Grimal, Nicolas. A History of Ancient Egypt. Librairie Arthéme Fayard, 1988. ISBN 90-04-12989-8.
  • Helk, Wolfgang. Schwachstellen der Chronologie-Diskussion. Göttinger Miszellen, Göttingen, 1983.
  • Lehner, Mark. The Complete Pyramids. Thames & Hudson Ltd, 1997. ISBN 0-500-05084-8.
  • Maspero, Gaston. History Of Egypt, Chaldaea, Syria, Babylonia, and Assyria, Volume 4 (of 12), Project Gutenberg EBook, Release Date: December 16, 2005. EBook #17324. https://www.gutenberg.org/files/17324/17324.txt
  • Murnane, William J. Ancient Egyptian Coregencies, Studies in Ancient Oriental Civilization. No. 40. The Oriental Institute of the University of Chicago, 1977.
  • Redford, Donald B. Egypt, Canaan, and Israel in Ancient Times. Princeton University Press, Princeton NJ, 1992. ISBN 0-691-00086-7.
  • Redford, Donald B. History and Chronology of the 18th Dynasty of Egypt: Seven Studies. University of Toronto Press, 1967.
  • Shaw, Ian. The Oxford History of Ancient Egypt. Oxford University Press, 2000. ISBN 0-19-815034-2.
  • Smith, G. Elliot. The Royal Mummies, Gerald Duckworth & Co Ltd., 2000. ISBN 0-7156-2959-X.
  • Spalinger, Anthony J. War in Ancient Egypt: The New Kingdom. Blackwell Publishing, 2005. ISBN 1-4051-1372-3
  • Tyldesley, Joyce. Egypt's Golden Empire: The Age of the New Kingdom. Headline Book Publishing Ltd., 2001. ISBN 0-7472-5160-6.
  • Tyldesley, Joyce. The Private Lives of the Pharaohs. Channel 4 Books, 2004. ISBN 0-7522-1903-0.
  • Weinstein, James M. The Egyptian Empire in Palestine, A Reassessment. Bulletin of the American Schools of Oriental Research: No 241. Winter, 1981.
  • Wente, Edward F. Thutmose III's Accession and the Beginning of the New Kingdom. Journal of Near Eastern Studies, University of Chicago Press, 1975.

КъватӀисел регӀелал

[хисизабизе | код хисизабизе]
Босараб бакӀ — «https://av.wikipedia.org/w/index.php?title=АхӀмос_I&oldid=100999»