Кьовул борт

Кьову́л борт, яги дати́в – вербалгунги новналгунги хIалтIизабулеб, жинца адресат (лIугьунеб иш сунде яги лъиде буссун бугебали) бихьизабулеб гIадатал бортазул цояб. Авар мацIалда лъие? сундуе? абурал суалазе жаваблъун бачIуна.

Авар мацIалда

Авар мацIалда кьовул борт лIугьуна хвалисал кьучIазде -е [-je] суффиксги жубан, масала: тIегь — тIогьо́- — тIогьо́-е (сундуе?); яс — я́с-алъ- — я́с-алъ-е (лъие?)

Аваралде дативалдалъун лIугьуна гьединго лативияб борт, гьелдасанго бачIараб сунхъего/лъихъего абурал суалазе жаваблъун бачIунеб адвербги (масала, цихъего (цицаго гIадин)), цинги гьалда хурхарал руго аварал (диалектиялги малълъун) инфинитивиял суффиксалги (-изе/-ине, диал. бакълъ. -е).

Датив лIугьуна (чанго батIияб хвалисаб форма рикIкIун):

• гIадатал новназул: чехь — чохьо́-е; би — би́-ду-е; мухь — мухь-лу́-е; моцI — моцI-ро́-е; бох — бо́х-алъ-е; ого́б — абги́-е; их (лъагIалил ригь) — охо́-ли-е; гIака́ — гIак-да́-е; чи — чи́-я-с-е; ада́ — ада́-е; яц — я́ц-алъ-е; рии́ — рии́-да-ли-е (роо́-е малълъунги)
  • субстантивазул: у́нтара-в — у́нтара-с-е (I); кве́ша-й — кве́ша-лъ-е (II); хъвалса́ра-б — хъвалса́ра-лъ-е (III)
  • цIарубакIазул: лъи́-е; су́н-ду-е; ди́-е; до-лъи́-е; лъо-си́-е; гьа́-лъи-е; гъо-си́-е; гьа́-гъа-си-е ги гь. ц.
  • рикIкIабазул: цо́-йи-е; кIи́-би-е; у́нкъи-е; а́нкьи-е; анцIи́ла щу́би-е ги гь. ц.

Дативиял рагIаби гIемерго хIалтIизарула гIоло абураб постпозициягунги: дие гIоло; эбелалъе гIоло; бичасе гIоло; дуего гIоло.

Гьалдалъун лIугьине регьула дериваталги: жи́нди-е-го-квеш (цIалула: жи́ндийгоквеш) «жиндиего заралалъе жо гьабулев чи (бичIчIун яги бичIчIичIого)», куту́-з-е-в-окь («кутузе вокьулев чи») ги гь.ц.

Диалектазул хаслъаби

Цо-цо диалектазда рагIулI кьовулалъул кIиабилеб рагьараб гьаракь тIагIуна: -е [-j-e] суффиксалъул месда -й [-j] рагIула, гьединанго диалектияз (хасго централияз) гьеб асараздацин хIалтIизабула, гьединлъидал гьеб рикIкIине бегьула кIиабилеб дативияб суффикслъун. МацIалъул рахъалIан гьеб гьедин букIин рагIигIунцIуеги лъикIаб буго.