КӀалкквей

КӀалкквей (гӀараб мацӀалда صوم)

Исламалъул ункъабилеб аслу ккола Рамазан моцӀалъ кӀал кквей. ШаргӀалда кӀал кквей абула рогьаралдаса бакъ тӀерхьинегӀан тӀубараб къад къоялъ кӀал биххулел жал гьаричӀого чӀеялда.

КӀал биххулел жал ккола кванай, гьекъей, чӀужуялъулгун жинсияб гьоркьоблъи гьаби, бокьун лагӀдей бачӀинаби, лагӀдей, къватӀиса ургьибехун бугеб кинабгӀаги нухдаса жанибе щиб бугониги бихьулеб жо биччай ва гьел гурел цогидалги. КӀал кквеялъ мунагьаздаса цӀунула, гӀибадаталде ругьун гьавула, гьаванафсалде данде чӀезе гьунар кьола, черх сахлъизабула, мискинзабазда гурхӀизе тӀамула. КӀал ккуразе букӀунеб кири Аллагьасда гурого лъаларо, гьезие хассаб алжанги буго, гьенив гьезда Аллагьги вихьизе вуго. ШаргӀияб гӀузруги гьечӀого фаризаяб цо кӀал кквечӀого тани, гьелдалъун гьесие ккараб зарал тӀолабго гӀумруялъ кӀал ккуниги бецӀун рагӀалде бахъунаро. Рамазан моцӀалъ кколеб фаризаяб кӀал малъичӀого, кӀал кквезе суннатал моцӀалкъоялги руго, кӀал ккурав чияс цӀунизе кколел суннаталадабалги руго, гьездаги тӀад чӀей гьабуни бицун хӀал кӀолареб кири щола.