ХъахӀабросолъа МахӀмуд

Википедия — эркенаб энциклопедия сайталдасан материал
Перейти к навигации Перейти к поиску
ХъахІабросолъа МахІмуд
Файл:Махмуд Магомедов.jpg
ТІокІцІар МахІмуд аль-Байзави (محمد البيضاوي)
ТІубараб цІар ХъахІабросолъа ТІайгибил МухІамадил МахІмуд
Гьавураб къо-моцІ 1872
Гьавураб бакІ ХъахІабросо, Дагъистаналъул вилаят, Россиялъул империя
Хвараб къо-моцІ сентябр, 1919 (47 сон)
Хвараб бакІ Игьали, Дагъистаналъул вилаят, Россиялъул империя
Вукъараб бакІ ХъахІабросо
ВатІанчилъи  Россиялъул империя
Халип:Флагификация/РСФСР
Миллат Аварав
Эмен ТІайгибил МухІаммад
Эбел ГІашурай
Лъади

1-й: ХъахІабросолъа Рабият

2-й: Жамилат
Адабияб гьунар
Пишаялъул тайпа ШагІир
Гьунаралъул санал 1887–1919
Адабияб мазгьаб Лирика
Жанр Поэма, шигІру
Асаразул мацІ Авар
Машгьурал асарал Марьям

ХъахІабросолъа МахӀмуд, яги ТІайибил МухІамадил МахІмуд (1872, ХъахІабросо, Дагъистаналъул вилаят1919, Игьали, Дагъистаналъул вилаят) — аваразул кІудияв шагІир, "Марьям" абураб машгьураб поэмаялъул автор.

Биография[хисизабизе | вики-текст хисизабизе]

Гьавураб заман ва хъизан[хисизабизе | вики-текст хисизабизе]

МахӀмуд гьавуна 1872 соналъ[1] Дагъистаналъул вилаяталъул ХъахӀабросолъ (гьанжесеб Дагъистаналъул Жумгьурияталъул Унсоколо мухъ). Гьев гьавиялъул заман батІи-батІиял иццазда рехсон буго батІи-батІияб. Лъалеб жо буго ТІоцебесеб дунялалъул рагъ байбихьигун, жиндиего бокьун армиялде хъвалев МахІмудица живго гьавураб сон хисизаби (40-ялдаса цІикІкІун сонал рарал хъвалел рукІинчІо, МахІмудие абуни 1914 соналъ букІана 42 сон). Дагъистаналъул пачалихъияб архивалда цІунун бугеб 1886 соналъ ХъахІабросоялъул халкъалъул къадар рикІкІараб документалда рекъон, гьеб заманалъ букІун буго 14 сон, гьесул вац ГІумарие — 5 сон, гьезул эмен ТІайгибил МухІамадие — 50.

МахІмудил эмен ТІайгибил МухІума (МухІаммад)[2] вукӀана рохьоб тӀурччи бухӀун, гьеб Хунзахъ базаралда бичизе хьвадулев чи. Лъай-цІали бугев гьес малъула МахІмудидаги гьесул вац ГІумаридаги. къуръан цІализе. МахІмудил эбел йикІана Бекьилъа ГІашурай.

ГІумар бетІербахъиялъе къватІиве ун вуго ва араб бакІ лъачІого тІагІун вуго, нахъе кІиго ясги тун.

МутагІиллъи[хисизабизе | вики-текст хисизабизе]

1879 соналъ МахІмудил эбелалъул рахъалъан имгІал Хъандулал МухІаммадица яцалъе кумекги гьабизе МахІмудие лъайги кьезе вачуна жиндихъего Бекьилъе. МахІмуд цІализе ккола исламияв гІалимчи ХІайдарил МухІаммадихъе ва цІалула гьесда цеве 1884 соналде щвезегІан. Гьелдаса хадув МахІмуд цІалула Хьиндаллъиялъул гІалимзабаздаги, Аваристаналъул цогидал росабазул гІалимзабаздаги цеве. ГІаммго цІали халат бахъуна къогогІан соналъ (1879–1899 гг.).

МахІмудги, ХарачІиса ХІаскъилги ИнквалитІаса Шахулисламги цІалулел рукІун руго машгьурав гІалимчи, Дагъистаналъул имам Нажмудинил эмен ХІоцоса Доногъо МухІаммадида цере. 1886 соналъ МахІмуд ана ГІашилтІа росдал мадрасаялде КъурбангІалида цеве цІализе. Гьениб лъугьуна МахІмудил гьунаралъе цІакъ кІудияб асар гьараб лъугьа-бахъин — гьев дандчІвана Аваристаналдаго цІар рагІарав шагІир ва гІалимчи БакьайчІиса ЧІанкІагун. Гьев живгоги цІалулев вукІана КъурбангІалида цеве, гьитІинал мугІалимзабазе дарсалги лъолаан гьес. МахІмудие букІана гьеб заманалъ 14 сон, ЧІанкІае — 21.

ГІолохъанлъи ва Муи дандчІвай[хисизабизе | вики-текст хисизабизе]

1899 соналъ Шураялда имамлъиялъул ва мугІалимлъиялул имтихІанги кьун хадув МахІмуд вачІана дибирлъун ХъахІабросолъе ва 1906 соналъ-лъагІан гьенив хІалтІана. 1899 соналъ ььес ячана ХъахІабросолъа РапигІат абурай яс, амма 5–6 соналдаса, лъимал рукІинчІолъиялъ, гьел ратІалъана. МахІмуд вахъана Бекьилъе; гьенив будунлъун вукІаго дандчІвала гьесда Муъминат (Муи), лъабго соналъ цеве Герейавлахъалда чуялъ гъоркье рехун рос хварай гІадан

Муи гьаюн йиго 1882 соналъ Сулейманилазул МухІамадгІалилги ПатІиматилги (ГьотІо) хъизаналда. Гьелъул йикІана жеги кІиго яцги — СалихІат ва Загьидат. 16 сон барай Муи кьуна росасе гІурус армиялда хъулухъ гьабулев вукІарав ХІасанил КъебедмухІаммадие, гьезие гьавула кІиго вас — ХІасан ва МухІаммадгІали.

МахІмуд вукІана Муил васазул мугІалимлъун, гьес кумек гьабулаан Муие рукъ-цІа бачине. МахІмудилги Муилги рокьи ккола, ва гьезда ракІалда букІуна ригьин гьабизе, амма Муил гІагарлъи цІакъ данде чІола гьелде ва рагІи кьола Муихъа лъимал рахъизе, гьей МахІмудие росасе ани. Гьедин МахІмудги Муиги ратІалъана. МахIмудица жинцаго абухъе:

« Борхатаб магIарда кIиго гIадрал тIегь

Цоцазде щапула, данде щоларо.

Гъваридаб кIкIалахъе кIиго иццул лъим

Цоцалъе чваххула, гъорлъ жубаларо.

»

МахІмуд нахъе ана Бекьилъа 1907 соналъ ва рещтІана ЦІатанихъ. Гьенив будунлъун хІалтІулаго (1907–1909), гьес эбел-эмен данде чІун рукІаниги, ячуна Жамилат абурай яс. Ригьин букІана битІ гьечІеб, МахІмудица лъади йиччан тола. 1910 соналъ МахІмуд ана Бакуялде. КІиго соналдаса нахъвуссуна. Гьелдаса хадуб Муил разилъиги щун, МахІмудида, гьей хъамураб хвел гьабун, ракІалде ккола Муи ячине. 1913 соналъ гьев Муигун ва гьудулзабигун вачІана ГІашилтІе. Данде бахъараб гІагарлъиялъ МахІмуд чІвалилан хІинкъалабиги кьун нахъюссинаюла гьей. МахІмуд чІвалилан ва жинхъа лъимал рахъилилан хІинкъарай Муица инкар гьабула гьесие росасе ине. Муи, бицараб рагIиги хвезабун, ун ятидал абун руго МахІмудица хадур машгьурлъарал рагІаби:

« Меседил лъималъул кьерги тІад гьабун,

Пахьул букІун буго бицараб рагІи.

ГІарцул хъал тІад жемун, жаниб тІухьи лъун

Йижун йикІун йиго ракІалъул гьудул.

»

ТІоцебесеб дунялалъул рагъулъ гІахьаллъи[хисизабизе | вики-текст хисизабизе]

БитІ ккечІеб рокьи захІмалъарав МахІмудица нигат гьабула рагъде ине. 1914 соналъул риидал гьев жиндирго росуцоялгун ана Хунзахъе рагъде унезул сияхIалде живгоги хъвазавизе. Рагъулгин тарихиял архивазул хъвай-хъвагІаязда гьев хъван вуго Магомаев Махмуд гІадин. Рагъул хъулухъ гьабуна гьес 1914 соналдаса 1917 соналде щун, гьесул гIелму-лъаялъухъги ралагьун[3] гьев тIамуна Дагъистаналъул 2-б полкалъул къадилъун, гьеб букІана командирасул хисунчиясулалде бащад гьабураб хъулухъ. Гьес хварал-чIварал бусурбаби, мусру жемун, исламияб къагIидаялъ рукъулаан.

МахІмуд ккола австриялъулаб фронталде (Карпатазде). Гьев чанцIулго рагъул тIоцебесеб кьерда вагъула, 1915 соналъул 10 январалда лъукъула. Рагъул бахIарчийилан гьесие Георгиясул хъанч бугеб медаль щвана (1916).

МахІмудил гьунаралъул бищун машгьураблъун, бищун лъикІаблъун рикІкІуна гьес Карпатазда вукІаго (1916) хъвараб «Марям» поэма, жинде букІараб рокьи тІагІинчІей ва тІокІалъ жий йихьичІей Муихъе ругьел[4][5]. Муи хвана МахІмуд рагъда вукІаго.

Октябралъул революциялдаса хадув МахІмуд тІадвуссуна гІадлу-низам биххараб Дагъистаналде (декабрь, 1917). Порт-Петровскалда (гьанже МахІачхъала) гьев вищула полкалъул комитетаталъул гІахьалчилхун, амма полк биххигун гьев нахъвуссуна мугІрузде. Унсоколо МахІмуд дандчІвала дагъистаналъулаб революционияб хІаракаталъул цевехъан ДахІадалазул МахІачгун.

ЧІвай[хисизабизе | вики-текст хисизабизе]

МахІмуд чІвана 1919 соналъул сентябралда. Гьев чІваялъул гІайибиявлъун рикІкІарав Магьдил МухІаммадица абухъе, МахІмуд чІвай букІун буго лъачІого ккараблъун.

Магьдилав, Игьаливе жиндирго унтарай гІагарай чІужуялъе цІолбода хадув МахІмуд вачІун вукІин лъаравго, гьесда гьболасда гІадин дандчІвай гьабизе ун вуго. Росдал имамгун ватула гьесда МахІмуд мажгиталъув. МаркІачІул какил заман гьеб букІиндал, какалги ран, гьел кІиялго ун руго Магьдиласдахъе. Гьебго заманалде гьесухъе гьоболлъухъ вачІун вуго ЧІикІаса кІиго гьобол гІи гочинабиялъул суалгун. Цоясда цІар букІун буго Хасбулатил Даци. Гьел гьекъон рукІун руго, цадахъги бачІун буго гьел гьекъезе жо.

Гьалбадерие саламги кьун буго МахІмудица, ругъун бугилан, гьекъолеб жоялдасаги инкар гьабун буго. Магьдилас гьев цогидаб рокъовехун ахІун вуго хабар-кІалалъе, амма Хасбулатил Даци рекІее гІун гьечІо гьедин МахІмудидехун гьабураб адаб-хІурмат. Чанго нухалъ гьес рагІиледухъ абун буго МахІмуд гІодовегІан гьаризесел рагІаби.

ХІурматалде ва лъикІаб бербалагьиялде ругьунав МахІмудие гьеб рекІее гІун гьечІо ва гьев къватІтиве ине вахъун вуго. Рукъалъул бетІергьанасе гьабураб гьоболлъиялъухъ баркалаги кьун, гьес къо лъикІ гьабун буго ва абун буго имамасухъе ине кколилан. Гьенир рукІаразул цояс абун буго дугІа гьабеян, амма МахІмудица инкар гьабун буго, гьел гьекъаразе щибго кумек гьабуларин абун, ва цІалун буго махсарояб экспромт:

« Мехтарав чиясе гІадлу гьабиги,

ГІадалаб гьоялда тІил кьаби буго.

Гьекъарав чиясе хабар бицинги,

Харил гьорда цебе цІа баки буго.

»

Гьеб рагІарав гьекъарав Даци лъугьун вуго иш хІалуцинабизе ва МахІмуд кьалде цІазе. МахІмудир сабру лъугІун буго гьекъарас гьев бихьинчи вукІун гьечІин абидал. Кьурун нахъги вуссун МахІмудица бихьинлъиги бихьизабун абун буго бокьун бугищилан дун бихьинчи вугищ, гьечІищ лъазеян ва чанго нухалъ хъатица кІал чІван буго Дацил. Хадусеб лъугьун буго лахІзаталда жаниб. Магьдилав кІанцІун вуго МахІмудидаги дандиясдаги гьоркьов вахъине, Даци къватІибе таманчаги бахъун лъугьун вуго ахІдезе МахІмуд чІвалилан.

Магьдилас махІкаматалда абуралда рекъон, гьес Дацил кодоса тамача бахъун буго ва къотІнобехун кьвагьун вуго. Амма гьес хадуб жиндирго васасе ва гІагарлъиялъе бицаралда рекъон, МахІмуд чІван вуго Хасбулатил Дацица, ва Магьдилас, рукъалъул бетІергьанас гІадин, гІайиб босун буго жиндего тІаде.

МахІмудида ругъун щвана нахъехун бетІералда, гулла къватІибе бачІун гьечІо. Гьеб ахІи-хІуралда гъорлъ бикъун ун буго шагІирасул рачелги таманчаги, гьебго сордоялъ тІагІуна гьениса кІиявго гьоболги.

Лъукъарав МахІмуд вачана ХъахІабросолъе, гьесул инсухъе рекъел гьабиялъе битІун бачІана делегация къурбаналъе оцги бачун. Амма вас чІаго хутІилилан вукІарав ТІайгибил МухІамадица дияталдаса инкар гьабула. Лъукъун хадуб МахІмудица бала ичІго къо. Гьесие кумек гьабизе рачІун рукІана Хьиндаллъиялъул бищун лъикІал тохтурзаби, Муил гІагарав чи, Бекьилъа Давудцие. МахІмуд чанго нухалъ гІакълуялде вачІун вукІана, гьесде раккизе рачІарал гІадамалцин лъан руго гьесда, амма кІалъазе кІун гьечІо. Хвана МахІмуд 1919 соналъул сентябралда, гьев вукъана ХъахІабросоялъул хабзалалъ[5].

Абула, МахІмудица холелъул абунин гьадинал рагІабиян[6]:

« «…Меседил гІадалнах гІарцул гвангвара,

гІадада хвелилан хиял букІинчІо…».

»

Гьунар[хисизабизе | вики-текст хисизабизе]

Ралагье гьединго[хисизабизе | вики-текст хисизабизе]

ХІужжаби[хисизабизе | вики-текст хисизабизе]

  1. МахІмуд гьавураб къо-моцІ мухІканго лъалеб гьечІо.
  2. Анасил МухІаммадилан рехсон вуго цо-цо хІалтІабазулъ.
  3. МахIмудида аварги гІарабги мацІалги гурелги, лъалаан гIурус, лъарагI, татар мацIалги.
  4. http://www.dagistan.ru/knigi/klasika/knigam/gasmahmnogoa.pdf
  5. 5,0 5,1 http://dagpravda.ru/specproekty/moe-nadgrobe-privlechet-vljublennyh/
  6. http://www.moidagestan.ru/blogs/48229/33525

Библиография[хисизабизе | вики-текст хисизабизе]

  • Авар миллаталъул некІо заманаялъул харбалги батІи-батІиял кучІдулги данде гьабураб мажмугI / бакІарарав чи: ГІабдулатІип Шамхалов. — МахІачхъала, 1929.
  • Авар адабияталъул мажмугI / данде гьабурав Р. ДинмухІамаев. — МахІачхъала: Дагъгизалъул басма, 1933.
  • Аваразул поэзиялъул антология. — МахІачхъала: Дагъистаналъул тІахьазул басмахана, 1958.
  • Гьудуллъи. 1978. № 3–4.
  • Литературияб альманах. — МахІачхъала: Дагъгиз, 1940.
  • МахІмуд. Тӏасарищарал кучІдул / данде гьабурав Я. Сулейманов. — МахІачхъала: Дагъкнигоиздат, 1966.
  • ХъахІабросулъа МахІмудил кучІдузул мажмугI / данде гьабурав ГI. Шамхалов. — Буйнакск, 1926.
  • ХъахІабросулъа МахІмудил кучІдул / данде гьабурав ГI. Шамхалов. — Шура, 1928.
  • ХъахІабросулъа МахІмуд. ГІищкъул рукъ / данде гьабурав З. Хӏажиев. — Махӏачхъала: Дагъгиз, 1940.
  • ХъахІабросулъа МахІмуд. Рокьул асарал / данде гьабурав Ш. МикагІилов. — Махӏачхъала: Дагъгиз, 1948.
  • ХъахІабросулъа МахІмуд / данде гьабурав ГI.-XI. Шахтаманов. — МахІачхъала: Дагкнигоиздат, 1956.
  • ХъахІабросулъа МахІмуд. Асарал / данде гьабурал: М. Рамазанов, ГI.—XI. МухІамадов, ГІабасил. М. — МахІачхъала: Дагъкнигоиздат, 1974.
  • ХъахІабросулъа МахІмуд. ШигІраби / данде гьабурав М.XI. ХІасанов, редактор К. Сулейманова.— МахІачхъала, Дагкнигоиздат, 1989.
  • ХъахІабросулъа МахІмуд. Панаяб хІухьел / данде гьабурав М.XI. ХІасанов, редактор ГI. Малачиева. — МахІачхъала: Юпитер, 1993.
  • ХъахІабросулъа МахІмуд / данде гьабурав М.XI. ХІасанов. — МахІачхъала, 1998.
  • ШигIраби / данде гьабурав А. М. МуртазгІалиев -МахIачхъала, 2019.